Pangalaman Jadi Wartawan (1)

Usĕp Romli HM keur ngawawancara dua kekentong “Mujahidin Afghansitan”
nu keur jihad ngalawan pasukan Uni Sovyĕt.

Ku H.Usĕp Romli HM

Keur kelas opat Sakola Rakyat (SR – ayeuna mah SD), taun 1958 di SR 10 Wĕsel, Sukamĕnak, Subang, murid sakelas ditaros ku ibu guru, naon cita-cita. Puguh baĕ nĕmbalan raĕng. Rupa-rupa. Aya nu hayang jadi insinyur, doktor (dokter), jĕndral, jsb. Malah nu boga cita-cita hayang jadi presidĕn gĕ aya.

Lantaran kuring cicing baĕ,teu milu nembrong, ku ibu guru disampeurkeun. Ditaros :

“Naon cita-cita hidep, Usĕp ?”

Teu asa-asa ngajawab :

“Hoyong janten tukang ulin.”

Na ĕta mah, panunjuk awi nu dicepeng ku ibu guru, langsung dihĕatkeun. Ngajebrod tonggong satarikna. Bari ngutruk ibu guru tĕh :

“Cita-cita nanahaon, kitu patut ! Jadi tukang ulin !”

Meunang sabulan dibenduan ku ibu guru tĕh. Untung ditaĕkkeun ka kelas lima. Ngan tuluy pindah ka Limbangan, Garut. Balik ka lembur. Da di Subang mah, milu ka Ua. Dikeukeuhan dikukut ti keur kelas hiji kĕnĕh.

Duka enya cita-cita, duka lain. Tapi nu jelas, kana ulin mah beuki. Balik sakola, ukur dahar, lĕos ka mana mendi.Keur di Subang, pangulinan tĕh kebon karĕt, pasawahan rawa, walungan Cipanggilingan jeung Cipunagara. Malah kungsi naĕk rakit di Cipunagara, nepi ka Ciasem, Sukamandi. Balikna nĕbĕng kana karĕta nu narik kai, ti Pagadĕn Baru, nepi ka Purwadadi. Ti Purwadadi, numpak “dogong” (lori) ka Kalijati. Tah, ti Kalijati, milu numpak setum nepi ka Cigadung, Subang. Ti dinya mah nikreuh leumpang. Datang ka imah, isa. Disintreuk jeung diceprĕt bitis ku Ua Istri bari diseukseukan, pĕdah ulin kamalinaan.

Geus di Limbangan gĕ teu robah. Cacak keur teu aman. Jaman gorombolan. Tapi ludeung wĕ ulin ka kebon atawa ka pasir nu jauh ti lembur, nu ceuk batur mah “sayang” gorombolan.

Milu ngarit atawa ngala suluh jeung babaturan. Ari kuring mah da teu ngukut ingon-igon. Ka nu ngarit ukur milu ulin wĕ, bari mantuan sautak-saeutik ngarawĕlan areuy nu dipikabeuki ku domba.

Taun 1962, aya kagiatan “Pager Bitis”. Tentara babarengan jeung rayat, ngepung “gorombolan” di gunung. Keur perĕ samen harita. Naik ti kelas 1 SMP ka kelas 2. Atuh kasempetan. Dibĕlaan maling-maling seselendep kana treuk “Thames” nu disayagikeun ku tentara, keur ngakut rayat jeung anggota OKD (Organisasi Keamanan Dĕsa) ka pos “Pager Bitis”. Najan treuk ukur semet sisi lembur,ti dinya nikreuh nanjak ka pasir atawa gunung, ka saung-saung nu geus diadegkeun pikeun “pos jaga”, resep wĕ nu aya.

Sabagian pangalaman ulin kitu tĕh, sok ditulis. Dikirimkeun ka majalah “Si Kuncung” atawa rubrik “Pengalaman Pembaca” nu aya dina “Lembaran Minggu” koran “Pikiran Rakyat” nu medal poĕ Saptu. Aya dimuat, aya henteu. Rĕrĕana mah tangtu wĕ teu dimuat.

Geus sakola di SPG Garut (1964), kana ulin beuki maceuh. Komo harita geus aya sababaraha hiji sajak dimuat dina rubrik remaja koran-koran Bandung. Boga sangkaan, nyieun sajak tĕh kudu nyeuseup heula kaendahan alam, sakumaha kagambarkeun dina sajak-sajak karya Muh.Yamin (basa Indonesia) nu mindeng kapanggih dina buku pangajara sastra, jeung MA Salmun (basa Sunda) nu mindeng kabaca dina majalah “Warga”.

Nu matak, unggal poĕ Minggu sok ngahaja tumpak karĕta api ti Garut ka Cikajang. Ngaprak ka kebon entĕh nu arĕndah pamandanganana.

Geus gaul di Bandung (1968), sagulung sagalang jeung para sastrawan Sunda, kayaning Rachmat M Sas Karana, Hikmat Sadkar, Us Tiarsa R, Hidayat Suryalaga, Dĕdy Windyagiri, jsb., nulis sajak teu kudu ngahajakeun nĕangan pamandangan ĕndah. Tina pangalaman hirup sapopoĕ ogĕ bisa.

Di Bandung, sok mondok tĕh di “asrama Kujang Putra”, Jl.Tawĕs No.6-8. Bumi kagungan Bapa R.Ĕma Bratakusumah, nu medalkeun Kalawarta “Kujang”. Dieusian ku barudak nu aktip dina organisasi “Kujang Putra”. Dipercayakeun ka Ĕdi Suhardi Ĕkajati, nu harita mahasiswa sajarah Universitas Pajajaran (engkĕna jadi Prof.Dr., pupus taun 2006).

Horĕng salah saurang dosĕn sajarah Unpad, guru Kang Ĕdi, nyaeta Ayatrohaĕdi (Prof.Dr,, pupus taun 2007), ngiring dumuk di Jl.Tawĕs. Sagebreg jeung barudak “Kujang Putra”. Kuring asa mobok manggih gorowong. Deukeut ka sastrawan moyan nu geus nulis karya sastra ti taun 1950-an (buku kumpulan carpon Kang Ayat “Hujan Munggaran” diterbitkeun ku Balĕ Pustaka, taun 1960).

Papatah Kang Ayat ka kuring :

“Nulis karya sastra mah, naha carpon atawa sajak, lila jeung kalan-kalan. Honorna leutik deuih. Leuwih hadĕ, urang diajar nulis naon waĕ. Artikel, berita, jeung sabangsana, sanajan kana nulis sastra ulah cul.”

Papatah Kang Ayat diĕstokeun pisan. Komo apan mindeng nĕnjo, Kang Ayat dikirim pos wĕsel ti ditu ti dieu. Ti koran “Sinar Harapan”, majalah “Intisari”, jrrd. Hiji poswĕsel rata-rata Rp 1.500 (sarĕbu lima ratus rupia). Badag pisan diukurkeun kana harga nasi rames di warung “Ampera” nu ukur Rp 2 (dua rupia). Bet gajih kuring (PNS Guru SD gol.II/a) ogĕ ukur Rp 425 (opat ratus dua puluh lima rupia) sabulan.

Nyobaan nyieun tulisan dina basa Indonĕsia, ngeunaan “seni badĕng” nu aya di Kp.Rancapaku, Dĕsa Sukadana, Kac. Limbangan. Ngahaja ngĕngkĕn tukang poto, motrĕt adegan “badĕng” keur maĕn. Geus anggeus dibawa ka Redaksi “Pikiran Rakyat” di Jl.Asia Afrika 133, pahareup-hareup jeung kantor Redaksi “Kujang”, Jl.Asia Afrika 128. Ditampa ku salah saurang patugas nu aya di dinya.

Heuleut saminggu, tulisan jeung potona dimuat. Ngan barang dibaca tĕh, rĕa kecap jeung kalimah dirobah. Meureun diomĕan ku redaksi.Jadi leuwih alus. Ngeunah dibacana.

Ĕta tulisan munggaran di “PR” dihonoran Rp 350. Puguh wĕ hojih. Bisa laluasa meuli buku.Bisa dahar seubeuh (mimindengna apan kalaparan).

Ti dinya mah, panceg rĕk ngamalkeun papatah Kang Ayat. Nulis naon baĕ bari henteu cul kana nulis karya sastra.

Honor nulis di “PR” jeung koran-koran sĕjĕn taun 1968-1970, leuwih gedĕ batan gajih PNS Guru SD gol.II/a nu dicangking ku kuring. Tapi henteu hayang ngĕcagkeun kalungguhan. Balik ngajar, bisa ngider nĕangan bahan tuliseun rupa-rupa kahirupan urang padĕsaan. Ti mimiti kadaharan (kulinĕr), kalangenan, nepi ka urusan sĕjĕnna dina hirup kumbuh sapopoĕ. Dimuar dina suratkabar “PR”, “Giwangkara” (Bandung), “Kompas”, “Suara Karya”, “Sinar Harapan”, “Berita Buana” (Jakarta), “Waspada” (Mĕdan), jrrd.

Salian ti meunang bahan tuliseun wangun laporan (reportase), jeung “human interĕst”, meunang keur bahan picarponeun, pisajakeun, katut piguguyoneun. Hasilna, kuring geus nulis sababaraha judul buku kumpulan carpon (Jiad Ajengan, Sanggeus Umur Tunggang Gunung, Sapeuting di Cipawening, Pĕngkolan Jalan Cikajang), novel (Bĕntang Pasantrĕn, Dalingding Angin Janari), humor (Oray Bedul Macok Mang Konod, Dulag Nalaktak, Jurig Congkang Bisul “Na Bujur), sajak (Sabelas Taun, Nu Lunta Jauh) jsb.

Jadi wartawan “bĕbas” (freelance) lumangsung ti taun 1968 nepi ka taun 1983, basa tugas dipindahkeun ka Dinas P dan K Prov.Jawa Barat. Tina guru SD langsung jadi Kepala Subseksi tingkat provinsi. Golongan dikatrol, tina II/d karĕk sataun, kana III/a. Kabawa ku jabatan.

Tapi teu laluasa. Salian ti sapopoĕ kudu makĕ baju “safari”, unggal Senĕn upacara bandĕra, teu bisa ngatrok nĕangan bahan tuliseun. Ma’lum digawĕ di Bandung, kapaksa cicing di Bandung. Ka lembur, ukur Saptu-Minggu wungkul. Tara bisa ka mamana.

Ukur kuat bubulanan.Mĕmĕh panceg sataun, rekĕs hayang jadi guru SD deui. Ditolak ku atasan. Nya mending mĕnta eureun we. Ĕta mah kaidinan. Ngan surat tanda eureun engkĕ dibarengkeun jeung SK pangsiun nu kudu diaras-urus ku sorangan ka ditu ka dieu. Horĕam.

Antukna mĕnta eureun tanpa pensiun. Asal surat tanda bukti eureun tina PNS kabawa harita kĕnĕh. Alhamdulillah teu hĕsĕ.

Surat tanda eureun tina PNS ditĕmbongkeun ka Pa Haji Parman S Jaydireja, salah saurang pimpinan SK “Pikiran Rakyat”. Ku anjeunna disĕrĕnkeun ka bagean personalia.

Sawatara jam ti harita, kaluar SK pangangkatan kuring jadi wartawan “PR”. 

Jadi wartawan “enyaan”. Fulltime. Lain “freelance”. Harita bulan Maret 1984.

Tugas kuring “diabur”. Nĕangan berita naon waĕ. Ngan harita kabeneran keur kurang tanaga wartawan ekonomi, nya ka dinya dilelempeng ku redaktur. Unggal poĕ ngaprak ka pasar di Kota Bandung, ti Cicadas, Pasar Baru, nepi ka Ciroyom.

Sakapeung ngaber ka puseur-puseur tatanĕn sayuran jeung bungbuahan di Ciwidey, Lembang, jsb. Saban poĕ, nyieun tulisan artikel widang “ĕkonomi lemah”. Tara pangangguran lunta ka bank, showroom, pabrik jsb, nu kagolong “ĕkonomi kuat”. Ĕta mah bagĕan batur. Aya nu geus maneuh.

Tungtungna mah lain nulis soal ĕkonomi wungkul. Tapi soal naon waĕ nu sakira matak narik perhatian nu maca. Disayagian rohangan tilu kolom di kaca 2.

Kungsi nulis soal tukang loak di pasar Cihapit. Taun 1985 asana. Sawatara taun ti harita, ĕta tukang loak nyuratan. Nganuhunkeun, lantaran sabada ditulis dina “PR” dagangna beuki maju. Barang loakanana payu pisan. Nepi ka bisa nyĕngcĕlĕngan keur ongkos munggah haji. Tah basa nyuratan tĕh, manĕhna karĕk balik ti Mekah.

Ku pimpinan di “PR” kuring dianggap bisa basa Arab. Pĕdah kungsi kuliah di IKIP Jurusan Pendidikan Bahasa Arab (1983), jeung di IAIN Jurusan Sastra Arab (1986). Basa aya utusan “Mujahidin Afghanistan” (1987) ka Jakarta, kuring ditugaskeun ngawawancara, jeung nyieun laporan ngeunaan kaayaan Afghanistan nu keur pakepuk ngalawan agrĕsi militĕr Uni Sovyĕt. Rakyat Afghanistan nu tanggoh ngalawan pasukan Uni Sovyĕt tĕh dikomando ku “Mujahidin Afghanistan”.

Atuh giak meunang tugas kitu tĕh. Sajaba ti meunang bahan rĕa jeung ĕkslusif ti pihak “Mujahidin Afghanistan” (biasana bahan-bahan tĕh ukur ti kantor berita asing nu rata-rata teu obyĕktif), kuring meunang “kontak” lamun isuk pagĕto niat datang ka Afghanistan.

Meunang dua peuting di Jakarta, marengan dua staf pimpinan “Mujahidin Afghan” nu diogan ku “Komite Solidaritas Dunia Islam” (KISDI) pimpinan Lukman Harun. Teuing sababaraha kali ngamuatkeun tulisan ngeunaan Mujahidin jeung Afghanistan dina “PR”.

Ti harita, kuring sok dipĕnta bantuan ku Redaktur Luar Negeri, nyieun tulisan-tulisan perkara dunya Islam hususna, dunya internasional umumna.

(Nyambung)

Dicutat ti Grup Pustaka Sunda.  Dimuat di Majalah Sunda Midang,No.125, 25 Maret-25 April 2015