"Mang, ari eta roda mie goreng teh ruksak?" ceuk Agus Ulen bari nyampeurkeun tukang mie goreng.
"Henteu Cep,"
"Naha atuh bet disurung, lain ditumpakan?"
Tukang mie goreng neureuy ciduh.
"Cik pesen hiji,"
"Lada, Cep?"
"Ari Emang, rek nyaho lada kumaha, apan acan diasaan?"
Tukang mie goreng neureuy ciduh deui. Terus masak mie goreng. Geus asak, song diasongkeun.
"Ih, geuning euweuh hayaman?"
"Hayamna aya nu ngagebah, Cep. Sareng upami aya hayaman mah mie gorengna bakal seep dipacokan?"
Panon Agus Ulen mureleng.
"Nya euweuh hayaman mah make baso atuh?"
"Ah, teu ilahar mie goreng aya basoan mah?"
"Naha?"
"Apan lem beurit ge teu aya beuritan,"
Panon Agus Ulen beuki mureleng.
"Namung upami hoyong dibasoan mah aya," ceuk tukang mie goreng nyarita deui.
"Mana atuh?"
"Apan eta aya dina lebet lancingan Encep?"
"Sia ngajak ribut?" ceuk Agus Ulen bari neundeun piring dina luhur roda.
"Naha da aing ge teu sieun?" tembal tukang nasi goreng bari ngarawel talenan. Habek diteunggeulkeun kana sirah Agus Ulen.
Der gelut rame pisan. Lila deuih gelutna teh, da euweuh anu misah. Eureun-eureun soteh lantaran duanana langlayeuseun alatan lapar.
"Cik pesen mie goreng hiji," ceuk Agus Ulen bari nyagap sirahna anu bancunur lantaran diteunggeul ku talenan.
"Lada, Cep?"
Dicutat ti Majalah Cakakak
Mairan ku Google
Mairan ku Facebook