Sanjaya

Basa Purbasora ngajorag Galuh, Sanjaya keur cicing di Mataram jeung ninina Dewi Parwati, nu jadi raja. Kadatangan Sena, bapana ka Kalingga,nu kabur lantaran disingkirkeun, ngahudang amarah Sanjaya. Kabeneran Sena jalmana sabar, Sanjaya dipapatahan yen malespati nu gurunggusuh tanpa tinimbangan nu mateng, bakal mubadir. Ceuk Sena, Sanjaya kudu ngahormat ka sesepuh Galuh, Sempakwaja, Jantaka, kajaba Purbasora. Sanjaya teu meunang kumawani ngaganggu sesepuh Galuh nu jumeneng keneh. Ku kaayaan nu ngadadak robah jadi panas, Sena jeung istrina Sanaha, gancang meungkeut duduluran jeung alo sabrayna, Dewasinga. Kabeneran disatujuan ku Ratu Parwati. Jadina. Sanjaya dikawinkeun ka Dewi Sudiwara,putri Dewasinga, incu Prabu Narayana, adi Parwati. Sanjaya jeung Sudiwara sarua pada pada incu Maharani Sima. Sanjaya jeung Sudiwara sarua pada pada incu buyut Maharani Sima . Narayana alias Iswara jadi raja di Bhumi Sambara taun 695- 742 M. Inyana jeung anakna, Dewasinga, memang miharep eta perkawinan. Sudiwara the adi Rakryan Limwara nu disebut Prabu Gajayana ( 760-789 M). 

Kawinna Sanjaya ka Sudiwara, jadi nambah kakuatan Sanjayakeur ngarebut tahta Galuh ti Purbasora. Sabalikna Purbasora posisina jadi kacepet, antara dua kakuatan. Kalingga di Wetan jeung Sunda diKulon. Sabab najan ayaperjangjian jeung Sunda, tapi Prabu Tarusbawa, nu mangrupa aki mertua Sanjaya, tetep kudu diperhitungkeun.

Ti Sudiwara Sanjaya boga anak Rakai Panangkaran nu lahir taun 717 M. Ti Dewi Teja Kancana, Galuh, Sanjaya boga anak Tamperan Barmawijaya, nu umurna geus 13 taun basa Rakai Panangkaran dilahirkeun. Keur ngahibur Sena, minantuna, Ratu Parwati nyerenkeun kalungguhan ka Sena jeung Sanaha, nu nyekel kakawasaan salila 16 taun (716-732 M) di Mataram. Parwati jeung salakina Mandiminyak nyekel kakawasaan salila 14 taun (695-672 M),saterusna ti taun 702- 716 nyekelkakawasaan sorangan,sabab Mandiminyak jadi raja Galuh, nu wafat taun 709 M.

Posisi Sanjaya kacida kuatna, di Mataram jadi putra Mahkota, ti Galuh boga warisan ti aki, ti Sunda boga warisan ti Aki-mitoha, sabab kawin ka putri mahkota. Mun sanggup berjuang ,Sanjaya kudu jadi raja gede ngawasa ¾ pulo Jawa. Nu keur alam harita,abad ka 8 mah mangrupa kajadian luar biasa.Umur Sanjaya harita 33 taun.

Rerencepan Sanjaya nepungan Rasiguru Wanayasa di Denuh. Ka ieu sepuh the Sanjaya ngaku anak Bratasenawa (Sena) nu geus kaleungitan hak di Galuh sabab direbut ku Purbasora. Ka resiguru Wanayasa, Sanjaya nawarkeun jadi manggala, pikeun ajegna kaadilan. Wanayasa nolak, sabab di pihak Purbasora, aya anakna Ki Balangantrang.Inyana milih netral dina pagedrugna turunan lanceukna (Sempakwaja) jeung turunan adina (Mandiminyak). Wanayasa menta jaminan sangkan dirina jeung kulawargana ulah dibabawa. Sanjaya nyanggupan. Nu dianggap musuh ngan Purbasora wungkul. Malah mun sagalana geus rengse, Sanjaya jangji moal ngaganggu nu lian ti Purbasora. Malah Wanayasa mapatahan sangkan Sanjayamenta bantuan ka Sunda, sobat bapana jeung aki-mitoha. Sabab mun nyusun gerakan di Denuh bakal gancang bakal kaciri ku urang Galuh. Sanjaya nyekel jangji ngagugu ka papatah bapana yen moal culangung ka angkatan sepuh. Padahal watek Sanjaya meh sarimbag jeung Purnawarman (Galak, Gangas). Datang ka Sunda, Tarusbawa ge milih netral, sabab jeung Purbasora geus aya perjangjian, tapi Sanjaya salaki incuna. Tarusbawa nganasehatan Sanjaya sangkan nginjeum buku Pustaka Ratuning Bala Sarewu. Pituduh keur ngagelar strategi pasukan gede sangkan boga daya tempur maksimal. (Dina Carita Parhyangan 1, disebutkeun yen Surawisesa mampuh ngabendung pasukan gabungan Cirebon-Banten, nu ngajorag jantung Pakuan, ku siasat tina buku Ratuning Bala Sarewu. Buku eta the Pustaka warisan Resi Guru Kendan) Sanjaya indit nepungan Resiguru Rabuyut Sawal nu nyekel eta pustaka, resiguru the sobat bapana keur ngawasa di Galuh.

Pasukan khusus Sanjaya disulundupkeun ka Gunung Sawal, sina latihan perang. Nu jadi sparing partnerna para bajak laut ti Selat Sunda jeung basisir kaler. Sabot kitu Prabu Tarusbawa, pupus taun 723 M dina yuswa 91 taun. Otomatis Sanjaya jeung Tejakancana jadi raja Sunda, dibantuan ku Patih senapati Anggada, nu ngalatih pasukan khusus. Anggada the incu Tarusbawa anak Mayangsari adi sabrayna Teja Kancana. 

Dina kaayaan sarerea nganggap yen kulawarga karaton Pakuan di Sunda keur dirungrum kasedih Ku pupusna Raja Agung Prabu Tarusbawa, Sanjaya disatujuan tur dibantuan ku Anggada, ngajorag karaton Galuh tengah peuting.

Taya nu manggapulia, sanajan kawentar pasukan bhayangkara garagah, ari diserang keur tibra mah, meh sadaya paragat. Purbasora tiwas dina perang tanding jeung Sanjaya. Nu salamet iwal Patih Bimaraksa Balangantrang jeung anak buahna nu bisa ngalolos, tur nyumput di Gegersunten. Teu mustahil lolosna Bimaraksa sabab dibere kasempetan ku Sanjaya. Sabab karaton Galuh nu dikuriling ku walungan, jalanutama katutup, katraton dikepung, tapi bias ngalolos, nyelendep ka luar ti karaton bari taya nu ngaganggu. Bukti jangji Sanjaya ka Resiguru Wanayasa.

Sanjaya jadi raja di Sunda 2 taun, di Galuh 7 taun, sabab kudu jadi raja di Mataram,narima warisan ti Indung-bapana, ahirna kakawsaan Sanjaya ngawengku Sunda, Galuh, Mataram. Salila 9 taun ngawasa Sunda-Galuh, Program awal Sanjaya, ngancurkeun Indraprahasta.

Sanjaya apal, sabenertna sumber aib nu nyingkirkeun Sena taun 716 the Indraprahasta. Sanjaya kacida hormat ka Bapa, komo sanggeus Resi Rabuyut Sawal mihormat Bratasenawa, Sanjaya nganggap wiwirang bapana leuwih gede batan wiwirang dirina sorangan,jadi pantes mun Indraprahasta ditumpes.

Bari ngagugudug nafsu, Sanjaya ngagempur Indraprahasta di suku gunung Cereme. Wiratara raja pamungkas, gugur, sakur kulawarga karaton ditumpes. Urut kakawasaan Indraprahasta, disaerenkeun ka Adipati Kosala, raja Wanagiri, minantu Padmahariwangsa. Posisi Indraprahasta diganti ku Wanagiri. Dina abad ka 15 Wanagiri robah jadi hiji desa nu disebut desa Cirebon Girang.

Sanggeus ngagempur Indraprahasta, Sanjaya pupulih ka Danghyang guru Sempakwaja,menta supaya Sang Demunawan ua Sanjaya, adi Purbasora, dijadikeun raja di Galuh. Pamentana ku Danghyang Guru ditolak. Sabab teu satuju, mun Galuh jadi bawahanSunda. KUlantaran pandita wijaksana, Sanjaya disindir, yen mun enya raja digjaya, kudu bias ngelehkeun nagara-nagara sabudeureun Galuh jeung Medang (Mataram). Sanjaya asa ditangtang, tanpa persiapan nu asak nnyerang Kuningan. Tapi Kapaksa kudu narima wiwirang, eleh, ku Wiragati raja Kuningan, nu kabeneran mitoha Sang Demunawan. Ahirna Sanjaya menta sangkan Danghyang Resiguru Sempakwaja nunjuk saha nu kudu jadi pangawasa di Galuh.

Resiguru Sempakwaja nunjuk Premana Di Kusumah, anak patih Wijayakusumah, incu Purbasora. Daek teu daek Sanjaya narima eta kaputusan. Ahirna Sanjaya cicing di Purasaba Sunda di Pakuan, teu cicing di purasaba Galuh. Ka Galuh Sanjaya ngirimkeun anakna ti Tejakancana, nya eta Rahyang Tamperan Barmawijaya, jadi patih sakalian pamingpin garnizun pasukan Sunda di Galuh. Sabenerna Sanjaya strategis mun cicing di purasaba Galuh sabab aya di tengah-tengah, antara Medang-Galuh-Sunda. Tapi kulawarga karaton Galuh teu raresepeun. Ahirna, Sanjaya 6 bulan jadi raja di Medang, 6 bulan di Sunda. Dina sataun pulanganting unggal geus 6 bulan Sanjaya pindah cicing.

Usaha Sempakwaja ngabendung kakawasaan Sanjaya, teu anggeus nepi ka dinya. Sanggeus nunjuk buyutna, Sang Premana Di Kusumah jadi raja di Galuh, inyana kudu ngamankeun posisi Sang Demunawan salaku Rajaresiguru Galunggung Inyana menta sangkan Sang Pandawa/Wiragati jadi guruhaji/rajadi Kayuwarang, tur Kuningan kudu dipasrahkeun ka Demunawan, minantuna. Taun 723 Sang Demunawan diistrenan jadi raja Saunggalah di Kuningan. Sang Demunawan disebut oge Sang Seuweukarma, boga wewenang kacida gedena, ngawasa sababaraha (13) karajaan leutik, di antarana:

Layuwatang, Kajaron, Kalanggara, Pagerwesi, Rahasea, Kahuripan, Sumajajah, Pasugihan, Pandurungan, Darongdong, Pagergunung, Muladarma, jeung Batutihang. Opat daerahdipingpin ku Guruhaji(raja daerah) sawareh ku buyut haden (Ki Gede). NGadegna karajaan Saunggalah, jadi saingan Galuh mu dikawasa Sanjaya, tapi dikcekel ku Premana Di kusumah. Wewengkon karajaan Saunggalah pernahna di tonggong gunung Cereme Beulah kidul, nu ayeuna jadi kampong Salia, desa Ciherang, kacamatan Kadugede, kabupaten Kuningan, kalereun Darma. Sabot kitu Sanjaya ngahibur diri ku panangtang Sempakwaja, nalukkeun karajaan-karajaab di Jawa Tengah jeung sawareh Jawa Timur. Karajaan-karajaan nu ditalukkeunku Sanjaya sawareh ngadukuku Sang Demunawan, jadi lawan Sang Sena, bapa Sanjaya raja bhumi Mataram.

Sanjaya kungsi nyerang Wiragati, nebus wiring. Tapi daerahna teu ditalukkeun. Sanjaya teu sieun ku Demunawan, ngan SangSena mapatahan teu meunang campelak ka kolot (ua), jeung teu meunang nyerang baraya.Kudu hormat ka kolot. Ahirna Sanjaya ngutus patihna nepungan Sang Demunawan, nepi ka mumusuhan the musnah kapupus. Demunawan ngaku kana kakawasaan Sanjaya di Galuh. Ahirna basa Demunawan nepungan Sanjaya, dipapag ku acara socoan,ngumbah suku semah nu dipihormat. ( Sempalan tina Majalah Basa Sunda Salaka cag. 

Dicutat ti Salaka