Jampe Nyeri Huntu

Hiji mangsa Emod indit ka Papua, maksudna rek ngalongok barayana nu mancen tugas di ditu.  Sababaraha poe cicing di ditu, kurunyung aya budak lalaki kira kira umur 12 tahun, asli urang Papua.

Kabeneran nu aya di imah ngan Emod wungkul, da barayana mah keur kalaluar.  Eta budak teh maksudna rek menta tulung lantaran anjingna gering geus ripuh pisan katempona teh.

"Eeeehhh .... Bapa! beta pu anjing sakit su sakarat .... tolonglah diberkati bapa!"

"Baiklah!" ceuk Emod, bari tuluy arindit nempo anjing eta budak. Kasampak teh eta anjing keur ngalempreh we bari renghap ranjug.

Nempo kitu tuluy Emod neueulkeun dampal leungeun kencana kana lebah tarang anjing, bari pok ngomong,

"Goooog.... gogog, sia teh mun rek modar geura hos atuh, tapi mun rek hirup deui buru buru geura cageur!"

Kitu kekecapan Emod teh, dipindo meunang sababaraha balikan. Ari si budak, lantaran teu ngarti basa Sunda, disangkana mah Emod teh keur ngado'a make basa latin sakumaha anu sok dilampahkeun ku para pendeta di dinya. Ku kituna eta kekecapan Emod diapalkeun nepi ka norolang.

Heuleut tilu poe, eta anjing diparengkeun cageur deui. Atuh si budak gura giru nepungan Emod, maksudna rek nganuhunkeun. Ngan barang nepi ka nu dituju, kasampak Emod keur ngaringkuk bari humarurung lantaran katarajang nyeri huntu.

Nyeueung kitu, teu antaparah deui si budak langsung neueulkeun dampal leungeunna kana tarang Emod, bari pok ngomong,

"Goooog.... gogog, sia teh mun rek modar geura hos atuh, tapi mun rek hirup deui buru buru geura cageur".

Emod nu keur ngaringkuk mimitina mah reuwas, tapi tuluy ngabarakatak seuseurian nepi ka nyeri kulit beuteung, nyeri huntuna ge ngadadak cageur harita keneh.

Disarungsum tina postingan kang Rahmat di Fb