Tongtolang

MUN ngadenge kecap Tongtolang pasti langsung inget kana kawih.  Enya, kawih Tongtolang Nangka teh pan legendaris pisan.  Sarerea ge tangtu moal bireuk. 

“Tongtolang nangka,
kawinan Bapa 

poe Salasa,
teu beja-beja……”

Tapi naon ari Tongtolang bisa jadi loba nu godeg.  Komo budak ayeuna mah nu geus jarang manggih.

Tongtolang (kétéwél) teh buah nangka nu ngora kénéh pisan.  Tara langsung didahar saperti nangka asak, tapi sok dicacag heula terus diseupan.  Geus asak dicoélkeun kana sambel atawa dipaké bukur angeun. 

Bisa oge dirujak.  Rujak sampeu nu sok dicampur jeung tongtolang teh. Sampeu atah jeung tongtolang dibebek dina lulumpang. Samarana cengek, uyah, gula, tarasi. Cengekna sing rada loba, ngarah seuhah. Dituang tengah poe, matak bengras cireumbayan.

Bisa oge diolah make oncom. Samarana cikur, bawang bodas, tarasi, cengek, uyah jeung gula.

Saluhureun tongtolang sahandapeun nangka ngora disebut lentud.  Geus teu kesed teuing siga tongtolang, tur sok dicoelkeun kana sambel.