Haji Jaman Walanda

Penampungan Haji di P Onrust

Usum Haji geus datang.  Sabaraha rombongan (kloter) geus mulai aya nu berangkat ka tanah suci. Meunang beja tina BBM grup, babaturan kuring basa SMP ge geus berangkat cenah.  Malah aya potona sagala, keur luwa lewe ceurik.

Tangtuna ceurik bungah.  Sab teu kabeh bisa berangkat haji jiga manehna.  Ngora-ngora deuih. Sok komo cenah taun ayeuna mah aya masalah visa telat sagala.

Ngobrol-ngobrol masalah haji, jadi panasaran.  Kumaha ari Haji jaman baheula, keur jaman Walanda? 

Berangkat Haji jaman harita mah tangtu teu sagampang ayeuna.  Kapal udara can aya.  Jadi kabeh jamaah kudu ngaliwatan laut, nu meakeun waktu mangbulan-bulan.  Jigana ti dinya aya tradisi hajat heula samemeh berangkat teh.  Enya, ku kaayaan harita nu sagala werit, loba kajadian nu berangkat haji teh teu baralik deui. Matak penting hahampuraan heula jeung dulur-dulur katut tatangga samemeh indit.

Ayeuna, ku kamajuan jaman, berangkat ka luar nagri teu hese deui.  Ka Arab, ukur jam-jaman ge nepi. Tapi tradisi hajat mah angger keneh.  

Kasibukan di Palabuan Jaman Walanda

Pamarentah Walanda harita oge nyieun aturan ketat nu ngahesekeun umat muslim berangkat haji. Walanda kasieunan jamaah haji nu mulang ka lemah cai mawa "ideu-ideu perlawanan" ti luar.  Ku sab kitu, Walanda ngamonopoli pemberangkatan haji.  Kapal-kapan Inggris nu tadina biasa mawa jamah haji ti nusantara dieureunkeun.  Ngan kapal Walanda wungkul nu meunang mawa jamaah nepi ka Arab.

Jang ngagampangkeun panalingaan, Walanda nyieun penampungan.  Ti taun 1911, Pulo Onrust dipilih pikeun jadi embarkasi jamaah haji asal nusantara.  Baheula mah aya tilu puluh barak nu masing-masing bisa nampung saratus jamaah.  Para jamaah haji kudu cicing di Pulo Onrust salila lima poe.

Para jamaah nu datang ti Tanah Suci dikarantina di ieu pulo.  Walanda oge sieun, jamaah haji nu balik ti Mekah mawa panyakit nepa.  Barang datang, Walanda nyemprot kapal jeung barang-barang jamaah haji ku cairan anti kuman.  Para jamaah wajib mandi jeung genti pakean karantina. Maranehna laju dipariksa di Pulo Cipir nu aya deukeut Onrust.  Ti dinya kakara bisa baralik ka asalna sewang-sewangan.