"Cik kumaha pamanggih Jang Guru, apan urang teh dikudukeun ngagunakeun basa Indonesia yang baik dan benar, tapi ari pamarentah unggal-unggal ngaganti kabinet angger sok ngagunakeun kecap reshuffle. Apan reshuffle teh kosa kecap basa Inggris?" ceuk Kang Suryana nanya ka Guru Yaya anu kakara jol datang.
"Ih, apan teu aya tarjamahna anu pas, Kang. Upami dipaksakeun, pasti bakal tumarumpang. Apan re teh hartosna ngulang, ari shuffle ngocok. Tah upami istilah ngocok ulang dipaksakeun diangge, bakal ngewa kakupingna. Sok we waktos Pa SBY ngarombak kabinetna, bakal aneh kacida upami aya media anu ngawartakeun .. baru-baru ini Presiden SBY telah mengocok ulang beberapa menteri, dan ada menteri yang tidak merasa puas, yaitu Fadel Mohamad,"
"He-he-he. Enya nya. Terus Pa Patrialias Akbar ge lamun ngagunakeun kecap ngocok ulang mah bakal lucu kadengenya nya Jang Guru. Apan wartawan teh nanya ... Pak Patrialis, bagaimana perasaan anda setelah dikocok ulang oleh Pak SBY? Pa Patrialis langsung ngajawab, .. ya keluar!"
"Ha-ha-ha. Leres pisan Kang, da harita Pa Patrialis mah milih kaluar ti kabinet nya ? Duka tah Pa Jokowi engke upami ngarombak kabinetna, naha masih ngagunakeun kecap reshuffle atanapi ngocok ulang?" ceuk Guru Yaya bari nyerengeh.
"Ke, nya bakal tulus kitu ngarombak kabinetna, Jang Guru?"
"Ih, ari dina media sosial mah tos saheng. Malih seueur tokoh parpol anu ngadesek sarta miharep Presiden Jokowi enggal-enggal ngarombak kabinetna,"
"Nya saha kira-kirana menteri anu bakal diganti teh?"
"Ari saur gosip mah, saurna Menko Polhukam Tedjo Edhy Purdijatno bakal digentos ku Luhut B Panjaitan, Seskab Andi Wijayanto bakal digentos ku Yuddy Chrisnandi, Menteri BUMN Rini Sumarno bakal digentos ku Emirsyah Satar, Menteri ESDM Sudirman Said bakal digentos ku Nazarudin Kiemas, Menpora Imam Nachrowi bakal digentos ku Budiman Sujatmiko, Mendikbud Anis Baswedan bakal digentos ku Prof Komarudin Hidayat, Menteri Kelautan Susi Pujiastuti bakal digentos ku Rohmin Dahuri, Menko Perekonomian Sofyan Jalil bakal digentos ku Darmin Nasution, sareng Jaksa Agung Prasetyo bakal digentos ku Prof Gayus Lumbun,"
"Euleuh, geuning mani rea kitu nya nu bakal digantina?"
"Ah, duka Kang, namina ge gosip. Nya urang antosan we kumaha geletuk batuna kecebur caina,"
"Tapi kahayang akang mah, sasaha anu bakal jadi menteri engke, sing bisa ngalaksanakeun tugasna. Sanajan asalna aya nu ti parpol oge, ari geus jadi menteri mah kudu bisa misahkeun antara kapentingan parpolna jeung kapentingan rahayat,"
"Leres pisan Kang. Tos jeneng menteri mah aranjeunna kedah tiasa melaan kapentingan rahayat,"
"Tapi lamun akang meunang usul mah, alusna menteri anu bakal jeneng engke teh kudu luyu antara ngaran jeung garapanana. Apan urang mah sakumaha anu dicontoan ku karuhun, masih keneh percaya yen kasuksesan teh nurut buat kana ngaran nu migawena,"
"Akang bade ngusulkeun saha kitu?"
"Akang mah bakal ngusulkeun Meriam Belina jadi Menhankam, Dedi Dukun jadi Menteri Kesehatan, Tarzan Srimulat jadi Menteri Kehutanan, Uya Kuya atawa Tukul Arowana jadi Menteri Kelautan, Bibit Waluyo jadi Menteri Pertanian, Parto Tegal jadi Menteri Dalam Negeri, Rhoma Irama jadi Menteri Luar Negeri, Mat Solar jadi Menteri ESDM, Agung Hercules jadi Menpora, jeung Inul Daratisna jadi Menteri Pertambangan, da apan pinter ngeborna,"
"Ha-ha-ha. Leres Kang, cocog pisan antara nami sareng garapanana. Malih abdi ge bade ngusulkeun Nirina Jubir janten juru bicara kapresidenan,"
"Tah enya, cocog pisan. Duta besar ge akang mah geus boga calonna, nya eta Hotman Paris jadi Dubes Prancis, Najwa Shihab jadi Dubes Arab Saudi, Tamara Blezenki jadi Dubes Slovakia, jeung Anya Dwinov jadi Dubes Rusia,"
"Hiji deui kalangkung Kang, Jamal Madrid janten Dubes Spanyol," ceuk Guru Yaya bari seuri.
0 comments:
Post a Comment