Darso, Si Raja Pop Sunda

DARSO téh salah sahiji inohong musik pop sunda.  Gumelar di Bandung ping 12 Agustus 1945, lalaki nu ngabogaan ngaran pepek Héndarso, salila leuwih ti 45 taun, satia midangkeun calung, parabot musik tina awi, anu saterusna dihijikeun jeung wanda dangdut sarta pop. Sawaréh urang nyebutkeun manéhna minangka Michael Darso Si Raja Pop Sunda, milah rupa ti raja pop dunya Michael Jackson. Sarakanana di lembur Cirateun, Lembang, Kabupaten Bandung Barat. 

Salila hirupna, Darso geus nyieun kurang leuwih 300 judul lagu, boh midangkeun calung atawa pop Sunda. Album éta aya anu direkam di studio, aya ogé anu direkam basa keur nyanyi di panggung.  Darso ngamimitian karirna salaku pamaén bas dina grup musik Nada Karya sarta Nada Kencana. Kungsi oge milu jeung Band anu dipiboga ku Puseur Persenjataan Kavaleri Bandung.  Tapi ngandeg lantaran kakeunaan perkara G 30 S/PKI.  

Dina taun 1968, anjeunna mitembeyan deui karirna bareng lanceukna Uko Hendarso midangkeun musik kalayan instrumen utama "calung". Salah sahiji lagu anu kawentar nyaeta "Kiamat'. Darso oge diajak pikeun témbong di RRI babarengan jeung grup Baskara Saba Désa.  Teu sawatara lila Asmara Record ngarékam pidangan Darso dina pita kaset. Sawatara lagu anu kaceluk nyaéta "Kembang Ujung", "Cangkurileung", sarta "Panineungan". Dina taun 90-an ngaran Darso beuki kawentar saenggeus TVRI mindeng mintonkeunana. 

Darso ogé ngamimitian make parabot musik séjéna kawas tarompet sarta organ.  Wanda musik anu dipidangkeun sajaba pop sunda ogé dangdut. Laguna anu kaceluk dina mangsa harita nepi ka kiwari nyaéta "Randa Geulis", "Maribaya", "Dina Amparan Sajadah", "Kabogoh Jauh". 

Dina taun 2005 manéhna meunang pangajén ti Gubernur Jabar Danny Setiawan mangrupa Kasinugrahan Musik Jabar 2005. Sina taun 2009 meunang ogé pangajén ti Walikota Bandung Dada Rosada mangrupa Kasinugrahan Budaya Dayeuh Bandung 2009. 

Darso pupus dinten Senén, kaping 12 Séptember 2011, dina wanci 15.00 WIB, di Rumah Sakit Soreang, Kabupatén Bandung.