Kang Ibing, Seniman Sunda Sagala Bisa

Saha nu bireuk ka Kang Ibing?

Kang Ibing teh salasaurang seniman asli Sunda nu ngaranna geus ngalegenda nepi ayeuna. Kasohor jadi seniman sagala bisa, Ibing Kusmayatna ngaran aslina mah Radén Aang Kusmayatna. Anjeunna lahir di Sumedang ping 20 Juli 1946. Putra ti Radén Suyatna Kusumahdinata jeung Radén Kusdiyah. Caroge ti bu Nieke tur bapa ti Kusmadika, Kusmandana jeung Diane.

Satamatna ti SMA, nuluykeun ka Jurusan Bahasa Rusia Fakultas Sastra UNPAD nepi ka lulus jadi sarjana muda. Nalika mahasiswa kungsi jadi Pupuhu Kasenian Daya Mahasiswa Sunda DAMAS, Penasihat Departemen Kesenian UNPAD, sarta jadi asistén dosén Fakultas Sastra.

Kang Ibing ngamimitian karirna salaku penyiar radio sarta nu ngokolakeun acara obrolan rinéh, bodor tapi pinuh ku kritik dina Radio Mara. Kalawan lentong Sundana nu has sarta cara mawakeun acara nu ngalér ngidul kumaha karep jadi hiji hal nu unik tur dipikaresep ku masarakat. 

Dina taun 1970, bareng jeung Aom Kusman, Suryana Patah, Wawa Sofyan, sarta Ujang, Kang Ibing nyieun grup lawak “de Kabayan”. Unggal personel dina De Kabayan ngabogaan ciri khas masing-masing, ngawakilan sababaraha etnis. Suryana Fatah misalna, biasana jadi babah Tionghoa nu ngaranna Koh Holiang. Wawa Sofyan jadi urang Jawa nu ngaranna Mas Sastro. Kang Ibing sorangan merankeun jadi urang Sunda nu ngaranna Kang Maman alias Ibing, lengkep jeung kopeah nyengsol jeung sarung nu disolendangkeun.  Samentara Aom Kusman biasana jadi jelema pang-normalna, da nu sejenna mah "garelo" :).

Kang Ibing oge maen filem.  Taun 1975 jadi tokoh utama dina pilem "Si Kabayan" kalawan produserna Tuty Suprapto. Tuluy maén pilem-pilem lianna kayaning "Aténg the Godfather" (1976), "Apanya Dong" (1985), "Si Kabayan dan Gadis Modéren" (1990), "Bang Kojak" (1977), "Boss Carmad" (1990), "Komar Si Glen Kemon Mudik" (1990), "Warisan Terlarang"(1990), jeung "Di Sana Senang Di Sini Senang" (1990).

Kang Ibing ngantunkeun di RS Al-Islam Jl. Soekarno Hatta Bandung ping 19 Agustus 2010.